Gen 4 | NdeIBE | STEP | U-Adamu wembatha lomkakhe u-Eva wasethatha isisu wazithwala wazala uKhayini. Wathi, “Ngosizo lukaJehova sengibelethe indoda.”

Genesis 4

UKhayini lo-Abela

1 U-Adamu wembatha lomkakhe u-Eva wasethatha isisu wazithwala wazala uKhayini. Wathi, “Ngosizo lukaJehova sengibelethe indoda.” 2 Muva wazala umfowabo u-Abela. Kwathi u-Abela waba ngumfuyi wemihlambi yezimvu, kanti uKhayini yena wasebenza umhlabathi. 3 Ngokuya kwesikhathi uKhayini waletha ezinye izithelo zomhlabathi ukuba ngumnikelo kuJehova. 4 Kodwa u-Abela waletha izitho ezinonileyo zisuka kwamanye amazibulo omhlambi wakhe. UJehova wamthokozela u-Abela kanye lomnikelo wakhe, 5 kodwa kamthokozelanga uKhayini lomnikelo wakhe. Yikho uKhayini wazonda kakhulu, lobuso bakhe bahloba.

6 UJehova wasesithi kuKhayini, “Uzondeleni na? Kungani ubuso bakho buhlobile? 7 Kambe ungaze wenze okulungileyo, kawuyikwamukelwa yini? Kodwa nxa ungenzi okulungileyo, isono sicwathile emnyango wakho; sitshisekela ukukuthumba, kodwa kumele usahlule.”

8 Kwathi uKhayini wathi kumfowabo u-Abela, “Kake sihambe siye egangeni.” Kwathi bekhonale egangeni uKhayini wamhlasela umfowabo u-Abela wambulala.

9 UJehova wasesithi kuKhayini, “Ungaphi umfowenu u-Abela na?” Waphendula wathi, “Angazi. Ngingumgcini wakhe umfowethu na?”

10 UJehova wathi, “Usuwenzeni? Lalela! Igazi lomfowenu liyakhala kimi lisuka emhlabathini.

11 Manje usuqalekisiwe njalo usuxotshiwe kuwo umhlabathi osuvule umlomo wawo ukwamukela igazi lomfowenu lisuka esandleni sakho. 12 Lapho uwusebenza umhlabathi kawusayi kuthela amabele kuwe. Uzakuba luzulane emhlabeni.”

13 UKhayini wathi kuJehova, “Isijeziso sami singaphezu kwamandla ami. 14 Lamhla usungixotsha elizweni, yikho sengizasithela ngingabi khona kuwe; ngizakuba luzulane olungelampumulo emhlabeni, kuthi loba ngubani ongifumanayo angibulale.”

15 Kodwa uJehova wathi kuye, “Akunjalo; lowo ongabulala uKhayini uzaphindiselwa ngokuphindwe kakhombisa.” Yikho uJehova wasebeka uphawu kuKhayini ukuze kuthi lowo omfumanayo angambulali. 16 Yikho uKhayini wasesuka emehlweni kaJehova wayahlala elizweni laseNodi, empumalanga kwaseEdeni.

17 UKhayini wembatha lomkakhe, wathatha isisu wazala u-Enoki. Ngalesosikhathi uKhayini wayesakha idolobho alibiza ngendodana yakhe u-Enoki. 18 Ku-Enoki kwazalwa u-Iradi, yena u-Iradi waba nguyise kaMehujayeli, uMehujayeli waba nguyise kaMethushayeli, uMethushayeli waba nguyise kaLameki.

19 ULameki wathatha abafazi ababili, omunye ethiwa ngu-Ada, omunye ethiwa nguZila. 20 U-Ada wazala uJabhali; wayenguyise walabo abahlala emathenteni abafuyileyo.

21 Ibizo lomfowabo lalinguJubhali; wayenguyise wabo bonke abatshaya umhubhe lechacho.

22 UZila laye waba lendodana, uThubhali-Khayini, owayekhanda zonke izinhlobo zezinto ngethusi langensimbi. Udadewabo kaThubhali-Khayini wayenguNama.

23 ULameki wathi kubomkakhe, “Ada loZila, lalelani kimi; bafazi bakaLameki, zwanini amazwi ami. Sengibulele umuntu ngenxa yokungilimaza, ijaha ngoba lingihlasele.

24 Uma uKhayini ephindiselwa kakhombisa yikho uLameki okwamatshumi ayisikhombisa lesikhombisa.”

25 U-Adamu waphinda wembatha lomkakhe njalo, owesifazana wazala indodana wayithi nguSethi, esithi, “UNkulunkulu usengiphile omunye umntwana endaweni ka-Abela, njengoba uKhayini wambulala.” 26 USethi laye waba lendodana, wayibiza ngokuthi ngu-Enoshi. Kulesosikhathi abantu baqalisa ukubiza ibizo likaJehova.